上年十月，形而下係Youtube 無預兆地Upload左新嘅錄音作品，叫《修蘭若處》，大大影響左我對生命嘅觀念。一年過去，歷經如新，感觸依舊，想同大家分享。

蘭若，原指森林，後指僧侶修行嘅地方。《修蘭若處》則視人生為修練靜寂的道場，講嘅係生命歷程 ：由青初以為生命可以自我掌控、經歷失望後報復式地沉淪、再到被壓至聲色俱殘先悟到開脫。

正當歌曲來到主角放開執著嘅主要段落，卻劈頭地來一句「生命中意義看破悉還在」

所謂看破，係接受左緣起性空呢個佛理，亦即一皆自有因，非我力所控。一旦認知到呢個概念，就冇乜野放唔低。

但係心礙在於句子最後的「悉還在」，即係

例如我知道肉身終會麻癈
例如我知道父母終會年老逝死
例如我知道相愛終將必相分
例如我知道意志終將會消磨殆盡
我知道都是必然、皆為幻法、無能為力
我都明白
但，「悉還在」，我無辦法唔介意

我認為《修蘭若處》厲害嘅地方在於道出左人生修練嘅兩層哀，一層係講出左對於世間事其實你係無能為力；二層係你介意自己嘅無能為力。


介意，呢份係生命中掀起波瀾嘅意識，先係修練嘅主要難關。但係《修蘭若處》最最最厲害嘅地方係佢提出左修補介意嘅方法。

修補介意嘅方法就係去理解其實無野需要你介意。正因為人生為假有、你我大家之間都無利益無虧欠，呢種不增不滅嘅觀念先帶出生命係可以再黎過嘅延續性。當企係呢個角度睇，就會發覺存於世界嘅一切，其實都係愛嘅流轉。呢種全部擁抱嘅心法，比起所謂放開執著，更加稱得上看破，亦更加對得起自己嘅「悉」。

-梅迪斯