【夏之躍動－本地indie樂團新專輯盛放】

今個夏天，本地indie圈簡直係「大師兄返嚟喇！我感覺到全都返晒嚟！」，live show多到豬仔錢罌都要打爛，MV、新樂隊睇極都睇唔晒，連專輯都密密麻麻地陸續有唔同樂隊推出，所以下面會簡單介紹一下依兩三個月不斷loop嘅幾張心水專輯：

// Bad Math －《Missing Narrative》//
等咗整整一年，佢地終於郁喇！Bad Math團不如其名，樂曲中各部分嘅完美結合絕對係經過精密考思同設計：充滿躍動感嘅乾淨音色同節奏，加上帶點知性美嘅主唱聲線，一個字「靚啊！」，建議各位可以戴上耳筒、伴隨夜幕在街上隨意搖曳。

// Fds/4eva －《Greatest Hits》//
2021男團熱潮盛放，Mi咩Er咩果啲宇宙天團唔提住，今年重點一定係超時空男團－友誼永固Fds/4eva嘅誕生！初出道靠性感、熱情、充滿魅力嘅演出，已經令萬千indie囝囡短時間內深深迷上佢地，首張Debut EP雖然只有三首精選金曲，但絕對足夠撼動樂壇！江湖從此多事！

// Lucid Express －《Lucid Express》//
隨著年月成長，Thud今年亦正式脫變成為Lucid Express，以新姿態再度炸裂心靈！除咗繼續承傳上張EP《Floret》甜蜜Dreamy嘅Synth主導曲風，新專輯帶領大家潛入更深之處，以更重更厚嘅結他音牆籠罩住歌曲，彷彿要喺你心房炸開一個大窿，作為shoegaze忠粉，依張專輯絕對會排喺我今年嘅頭幾位。

// Bedroom Party －《Cubes》//
今年最大驚喜，絕對係認識咗只能用「出色」嚟形容嘅佢地 - 由Tomi Ramu同Lilong兩位全能音樂人所合組嘅Synth-wave樂團，以層層堆疊嘅復古音色引領大家自然地跟住節拍起舞，近日一直翻播又翻播，令人充斥著猶如乘清風飛翔、被海面浪花慢慢洗滌嘅感覺，I WANT MORE~

// Franklin Telescope －《Burst into Your Quirky Soul》//
跳舞跳舞跳舞！今年有幸接觸多咗Franklin，成軍多年嘅佢地終於喺今個夏天推出首張專輯，除咗繼續以Funky節奏帶動肢體擺動，今次專輯亦作出多種新嘗試，其中最驚喜係以日文入詞、創作出都市感十足嘅〈十月の空気〉，聽得出依張專輯係多年來勤奮努力、集大成嘅結晶品，好期待31號專場演出！

// Arches －《Goodbye Tragic Manga》//
直球轟炸，一顆新星突然橫空誕生！插畫家Jack Ip同模特兒Takuro二人組成嘅Arches，罕有地以廣東話來一記直球搖滾，令人久違地發現原來香港indie樂團都可以如此青春熱血；Debut Album首推出已經引起圈中熾熱討論，流麗爽直嘅結他掃蕩配上熟悉嘅廣東話，實在真係「有種感覺在迴響」，期待能夠喺現場同佢地揮灑汗水！

-果占