鬥牛梗 -〈再〉

鬥牛梗暌違3年新作--〈再〉，用周易嘅「萃」掛揭示相聚嘅開端，隨後都係講述別離所引起嘅波瀾、呢次嘅相聚烙下左一個纏繞心靈嘅印記。鬥牛梗呢隊band，甚至成員們嘅人生都係不斷咁係別離之中前進，所以〈再〉呢首歌，就好似同生命嘅所有相遇黎一次大歸返，份量非比尋常。

一般我地唸經都係求洞破求平靜，但係〈再〉卻有種迫狗跳牆的感覺，我諗大家都冇諗過心經原來可以讀得如此焦急。就好似啲恐怖片入面啲人見到彊屍，係極度恐荒下尖叫舉起十字架，因為眼前出現嘅憑自身係無法克服，只能將一切押在呢啲符號（經文）之上，祈求可以幫到自己。而今次呢個敵人嘅恐怖之處在於其無形不可攻不可守：佢係超越器官承受嘅別離之苦。

佛家一個重點，係緣起性空，姐係無野係你可以掌握，你只係一連串事件中的一點。歌中提用佛家經文(恕不詳列)，就係想重申愛別離都係非關我因，藉此去開解自己。但愈係想說服自己，就愈係顯得介意，介意自己無能為力。正如歌入面一直有兩把聲係到拉扯緊咁，呢個係鬥牛梗獨有嘅修為。

不妨將〈再〉視之為〈我很掛念你〉嘅大結局（雖說〈在巧合與巧合之間〉先係續集）。〈我〉有個好明顯要陳情嘅對象，對象失去以後，〈再〉要處理嘅就只係自己嘅「念」，不捨嘅念頭，極難對付。我諗起形而下〈修蘭若處〉個句「生命中意義看破悉還在」 ﹐就算知道個道理都好，但係「悉」始終係介懷。

臨尾唸左般若婆羅蜜多心經，最後即說咒曰中「揭諦」係有「渡」嘅意思，即係叫人要去體驗。林權澤有套戲就係叫 《揭諦 揭諦 婆羅揭諦》，女主角係剃渡到還俗期間經歷幾次身邊人嘅死亡，佢係走入人世間所面對嘅人事中，悟得蟬意嘅真機。婆羅揭諦，就係要有呢啲切身體驗先渡到去彼岸。

而「菩提薩婆訶」有圓滿涅槃嘅意思，然而當唸者吼得近似自毀。到底用力避開執念咁去歇斯底里唸出經文後，唸者究竟係完功得道、定係墮入無間嘅苦。大家各自揭諦去感受。

（梅）