話說係03年歐冠盃嘅時候，有班布魯日(Club Brugge Kv)球迷喺入場前一間酒吧飲酒，咁啱聽到The White Stripe啱啱係電台plug緊嘅〈Seven Nation Army〉。因為個riff太上口，於是佢哋就一路哼到入球場、哼到入波，仲順利贏埋AC米蘭，首歌就變成咗球迷們嘅非正式隊歌。

後來AS羅馬贏返布魯日轉頭，對家球迷又學起上黎哼出〈〉嘅riff，於是呢首歌就廣泛喺意大利嘅球迷之間流傳。喺2006年，意大利又巧合地對7個國家嘅賽事之中過關斬將，勝出成為該界世界盃冠軍，令到呢首歌唱到成個意大利街知巷聞。自此，SNA就成為咗各大球類賽事不可或缺嘅部分。

呢首爆得起，固然係因為Jack white以Power chord作為佢音樂嘅主要基礎 ，而White Stripe時期嘅兩件頭創作，令結他riff部分更加突出，更加容易畀人記住。但係呢首歌本身冇成為運動國歌嘅意圖，傳頌純粹係無心插柳，要認識Jack White，可始於此，但絕不止於此。

對我黎講，Jack White嘅Legacy反而係The White Stripe解散左之後先開始。

Dead Weather 2010年嘅《Sea of Cowards》係我認識Jack White 嘅起點，嗰時我冇乜概念，淨係知呢隊嘅成員都嚟自響噹噹嘅樂隊，係隊superband。而係當我聽嘅時候，我有種第一次睇幻影旅團係Hunter X Hunter登場個時嘅感覺：神秘、深不可測。相當令我著迷。

The Dead Weather個種誘餌性嘅唱腔、spooky嘅節奏、警報般惹人不安嘅melody，統統堆疊起來，就好似一個引人探險嘅古堡，最深處聚集咗幾個行徑古怪、動機不明、魔力高強嘅人士進行秘密會議。而當知道平時撚開結他嘅Jack White係入面竟然係打鼓個個，令我暗忖佢會係大佬中嘅大佬。

對比起WS時期，Full Band形式嘅創作更加support到Jack White音樂上嘅魔力。例如The Raconteurs有意無意加插鄉村風味，顯出其粗暴玩法都有意想不到嘅包容性。而Solo嘅作品更將佢嘅粗暴美感展伸到每一件樂器上：fuzzy tones、 誇張嘅guitar solo，彷彿佢挑動緊嘅唔係吉他弦，而係你嘅神經線，但又會情不自禁想俾佢lead住走，感覺似抓龍根?(未抓過，唔知，估)

我更鍾意網上流傳一個講法係「Jack White痴左線」，皆因對上一次2022年一連出左兩隻碟，呢頭玩下印度cult加Rap(〈Hi-De-Ho〉)、個頭又玩下民謠(《Entering Heaven Alive》)，有唔少人擔心佢嘅健康狀態，但正因為玩得咁瘋狂，更加顯出佢嘅駕馭力。網民話：「Jack white has lost his mind and I love it」，Me Too。

佢賣嘅唔係技巧超卓嘅結他solo（當然佢都有），而係粗暴原始嘅力量，Jack White會形容係同結他打場交，然而佢一打就打出個Garage Revival，絕對稱得上音樂史上其中一位結他hero。而《No Name》嘅Jack White，個種primitive同spooky好似藍焰咁燒得正火正熱，堪稱得上生涯最佳狀態。多謝clockenflap，有機會俾佢抓下龍根。


文： 梅迪斯