您的購物袋內沒有商品！
會員中心
收藏
訂單記錄
\\內含劇透//
以cyberpunk見稱嘅攻殼電影近日4K重現大銀幕，絕動推薦俾一眾對動漫文化有興趣又鍾意諗野嘅朋友去睇。攻殼成個系列有漫畫、動畫、電影，對門外人黎講可能唔知點入手，如果單以觀賞時要求嘅嚴肅性做分類，可以簡單講以電影最重、動畫次之而漫畫最輕鬆。不過負責任咁講一句，全部同我睇Ｌ哂佢就啱了。
攻殼個世界觀同美術設計固然吸引，但背後提出嘅哲學問題先係重點，足夠大家諗一世。係到拋個磚黎引大家入坑，係solid state society(第三季動畫)入面就有個狂人將社會上獨居又得返半條人命嘅老人家嘅財富轉移到一個叫SSS嘅計劃﹐呢個計劃超簡單咁講就係將社會上缺乏照顧嘅細路仔捉哂返黎洗腦培育做精英。係啊，個手法係好極端，所以主角所屬嘅特務組織公安九課就前去瓦解成個集團計劃。
以法律正義為名嘅公安九課係成個行動之後，陷入左深深嘅質疑。因為呢個狂人的確用佢嘅手段達到分配正義，將本會浪費嘅遺富轉移到未來人材上，呢個計劃嘅收益成效絕到比吓吓講程序嘅社會快捷直接，成個概念無可挑剔。而公安九課嘅所謂執法反而令到一班細路仔回歸冇前途可言嘅生活、貴腐老人嘅剩餘財富繼續被浪費。
問題黎喇，打擊左極端主義嘅抬頭，但係之後呢？極端主義嘗試解決嘅社會問題持續落去，咁又何得何能稱得上自己為「正義」呢？呢份正義嘅立足點究竟係邊？
有冇答案？我都想知。不過公安九課課長荒卷大輔就好無奈咁講左一句「只希望事件入面每個個案都可以單獨咁被審視處理。」我好鍾意。因為捆綁一班人用同一個準則去處理，只會抹殺個體嘅人性。每一條生命都得到尊重，先係最大嘅正義，亦係最難嘅事。
—梅迪斯
