您的購物袋內沒有商品！
會員中心
收藏
訂單記錄
用〈Forbidden colours〉作為認識David Sylvian應該係最典型嘅選擇﹐呢首用作描述同性之魅電影《俘虜》嘅主題曲，名字採用左三島由紀夫嘅盛名作《禁色》。
有趣的是，三島筆下主角悠一有傾倒眾人嘅絕色、《俘虜》入面嘅關鍵角色Maj. Jack有足以反俘虜軍官嘅容貌、而唱〈Forbidden Colours〉嘅David Sylvian則有天下第一美男子之美譽。
Yes，it is all about 美男子。
小說《禁色》表面上係講一個同性戀者嘅故事，但其實更係講緊美同醜嘅敵對。小說真正嘅主人翁係老邁嘅小說家檜俊輔，因為容樣衰老而不再被愛，所以培育美男子悠一向愛情報復。佢教導悠一異樣嘅色慾，正常嘅男女之歡、平常嘅人生對美男子黎講係罪惡嘅。
David Sylvian就好似三島想似像嘅完美人物咁：靚仔到無譜，音樂又唔按章出牌，低迴妖冶嘅歌腔、低限式嘅編曲主義反而為佢嘅俊美增添無可企及嘅光芒。正如現代人成日講女仔可愛就係正義，同樣地靚仔就係唯一嘅道德。
美嘅擁有者必須要大放異彩、唔向世界折服、迷惑眾生先算得上冇辜負「美」呢個字。David Sylvian就絕對做到，除非你唔望你唔聽，唔係你一留意就會墜入佢嘅美之陷阱。
然而，小說入面檜俊輔近乎偏執嘅要求最終引來反撲，悠一係一輪放任嘅行徑後，係自己嘅妻子同兒女身上發現愛，對檜俊輔黎講，呢份平庸嘅愛情先係真正嘅禁色。但因為悠一實在太靚仔，呢份背叛反而令佢窒息。可憐檜俊輔以為可以靠美黎掌弄世界，反而裁倒在美男子之下，三島又何嘗唔係咁?
David Sylvian作為美嘅倖存者，皮囊嘅衰老無礙佢自由快活嘅心靈，進入21世紀依然貫徹佢偏峰嘅路線，早幾年就同板本Sir溯本追原玩返Spoken Word(〈Life，life〉)，踏入耳順之年仍舊光芒四射，呢種inner beauty先係真正不滅、令人臣服。
-梅迪斯
