連港督都為之神魂癲倒粵語情歌集

【連港督都為之神魂癲倒粵語情歌集】
https://www.facebook.com/zenegeist/videos/%E9%80%A3%E6%B8%AF%E7%9D%A3%E9%83%BD%E7%82%BA%E4%B9%8B%E5%82%BE%E5%80%92%E5%98%85%E7%B2%B5%E8%AA%9E%E6%83%85%E6%AD%8C%E9%9B%86/329677488345431/
香港第十七任港督金文泰爵士係語言天份極高嘅學者，在委任成為港督前曾經獲得過拉丁同希臘詩文獎。當佢係98年從牛津大學獲得學士學位後，就獲當時嘅香港政府聘任為官學生，於是就被派去廣州學習粵語和書法，短短一年就通過粵語考試及格畢業。係正式委任為港督前既廿幾年前，即係1903年至1906年，係香港擔任地政法庭兼新界地政官嘅時候將清代遺留落黎嘅粵語歌集《粵謳》內翻譯成英語，題名Cantonese Love Songs。

呢本《粵謳》有咩特別動人之處？金文泰就認為，《粵謳》表達嘅情感雖然過於哀傷，但係係可以體味箇中嘅音韻之美，即使係最冷酷嘅奸商、最粗俗嘅苦力，都能夠被打動。

有學者推敲早係西漢時期已經有粵謳出現，但係被人著重形式上嘅流傳，就要數到係清代中葉﹐招子庸1828出版《粵謳》一書，正正式式俾呢種音樂一個名，而且搜集了近百首歡場流傳既歌曲，輯錄成書成為文獻紀錄。何謂粵謳?粵謳係一種類似木魚歌、南音嘅廣東唸白樂曲，旋律沉郁悲凉，加上蜑家歌自娛又自艾貼近生活嘅取材方法，而變調創出來嘅新曲式。而謳嘅意思就係吟哦自傷﹐即係主題多數係情場失意嘅苦水。

《廣東新語》就咁樣形容：“其歌也，辭不必全雅，平仄不必全葉，以俚語土音襯貼之，唱一句或延半刻，曼聲長節，自回自復，不肯一往而盡”。

粵謳這種體裁又叫解心。如何解心呢？歷史學教授程美寶就樣形容解心:頭幾句一定係哀怨，但最後幾句，就係要抒解心結。我地睇下《粵謳》入面第一首〈解心〉係點樣形容「心各有事，總要解脫為先。心事唔安，解得就了然......唉，須要自醒，世間無定係楊花性，總係邊一便風來就向一便有情。」(我地不妨聽一段:
​

粵謳載錄嘅文體同我地平時聽開既粵語好唔同，係因為我地平用得相當入世粗俗，但只要我地細心咁運用，都有佢風雅嘅一面。《粵謳》呢種跌宕多姿文學修辭，雅俗共賞係說唱文體實在值得我地好好學習。

招子庸《粵謳》係自序入面只有一句：「越(粵)謳篤摯，履道士願，樂欲聞，請以此一卷書，普度世間一切沉迷慾海者。」係以前仲未講求自由戀愛既華人社會，風月之地就係唯一認真談情說愛嘅 地方，所以入得去聽煙花女子唱粵謳都有一定既共感。當時粵謳既流行程度就好似我地依家聽16號愛人、心淡咁，每個人都接到一兩句，無他，個個人都想係情債之中過得舒服啲。呢啲演奏後來由瞽姬(盲眼藝人)流傳，成為民間娛樂，但係隨著社會開放，呢啲適合表演場地逐一關閉，粵謳文化都開始散落，即使香港電台在六十年代也有過解心節目，依家都接近失傳。


音樂係時代既產命，粵謳既形式內當然隨住時代改變過。例如辛亥革命個時，革命派就利用呢種深得群衆喜愛既民間說唱文學形式，作為宣傳鼓動革命思想嘅武器，創作了大量抨擊朝政、針砭時弊、諷刺貪官污吏嘅作品，用生動活潑嘅語言、聲調，表達了當時人們嘅生活和鬥爭。

係呢到，我想用一首黃花影獻俾苦難中嘅香港人。呢首係用黎紀念黃花崗起義中入面，個班冒死參加起義嘅人所懷住滿腔嘅熱血：

黃花影
黃花影，尚帶住的血痕鮮。

顧影知是英雄，且屬美少年。試睇英姿瀟灑，慷慨兼剛健；枝傲橫秋，可見得佢骨節堅。秋風秋雨，日把黃魂練；不比春花嬌媚，只係乞人憐。

人見佢自由花放，個個心欽羨；須知有許多萌蘖，蹴損在春天。呢吓北顧燕雲，重係多幻變；須整便，齊與金風戰；待到凱歌高唱，痛飲在花前。

借以上幾句勉勵香港人，我地仲有好多要做，唔好放棄，唔好忘記。

-梅迪斯

延伸閱讀／聆聽：
粵謳與辛亥革命 楊永權
https://bit.ly/2ZnaZcm

黃花影錄音:
https://app3.rthk.hk/special/pau/article.php?aid=2566

愛書堂:
http://www.booksloverhk.com/poetrecent49_liu_add._1b.htm

姚達兌《<粵謳>的英譯、接受和敘事》
https://freewechat.com/a/MzI2ODI4MzM1OA==/2247499822/1